අලුත් අවුරුදු ජන ක්‍රීඩා සඳහා ඔන්න මගෙන් "කෙළි ගීත"

අලුත් අවුරුදු ජන ක්‍රීඩා සඳහා ඔන්න මගෙන් "කෙළි ගීත" කීපයක්.....මේ කෙළි ගීත ,හෙවත් ක්‍රීඩා වලදි භාවිතා කරන කවි සහ ගීත බොහොම පරණ ඒවා.....අමාරුවෙන් හොයාගෙන ඇවිත් මේ දෙන්නෙ, මේවා මතු පරපුරටත් නොනැසී දායාද වෙන්ට ඕන නිසා......

01.
යාර තිහේ රවුමට ඇඳි වළල්ලා.......
රවුමට පිටින් දෙන්නයි රැකි වළල්ලා.....
රන් රේට් අප් කරන රාන් රන් වළල්ලා......
පවර් ප්ලේ එකේ ෆීල්ඩිං වළල්ලා.....
මේ කවිය වැඩිපුරම භාවිතා කරන්නෙ අම්පයරක්කාරයන්.....මේ අම්පයරක්කාරයන් මේ කවිය ගායනයට පෙර දකුණු අතින් අහසේ රවුමක් ඇඳීම චාරිත්‍රානුකූලව සිදු කරනවා......
02.
වාර හතර වට බෝල පලන කළ - වළ ගියෙදෝ මගෙ ඕවරයා.....
බෝලර නුඹ පල්......නුඹෙ කීපර් පාල්...
අප දුටුවේ නැත ඕවරයා.......
මේක පන්දුක්කාරයන් විසින් පිත්තක්කාරයන්ගේ දැඩි ප්‍රහාරයට ලක් වී සිටින විට ගයන මැසිවිලි කවියක්......වැඩිපුරම අසන්නට ලැබෙන්නෙ ක්‍රිස් ගේල්, සනත් ජයසූරිය, ෂාහිඩ් අෆ්‍රිඩි, ඒ.බී ඩිවිලියර්ස් වගේ දෙවිවරුන්ට පූජා වශයෙන් කරනු ලබන ක්‍රීඩාවලදී නිතර ගායනා කරනු ලබන ගීයක් ලෙසයි...
03.
උඩ යන පන්දුව.... අ....අ... අල්ලාපන්නේ......
බිම එන පන්දුව...අ....අ...නවතාපාන්නේ......
ත්‍රෝ එක එනවිට....අ.....බිය නොමවන්නේ.....
පත්තිනි දෙවිඳුට....අ.....පින් දීපාන්නේ......
මේ කවිය කලුවිතාරණ සම්ප්‍රදායෙන් මුල් වරට ජනිත වූ " කීපර" මාලේ කවි වලින් එකක්......
මේ පහතින් දැක්වෙන ඉතිරි කවි සහ ගායනා සියල්ලම පිත්තක්කාර සම්ප්‍රදායට අයත් ජන ගී නාද රටා......
04.
දාන ලෙග් ස්පිනර් ස්ලිප් හෙම නියම කොට.....
මිඩ් ඔන් මිඩ් ඔෆ් දෙපළම යොදවා යසට......
මාන බලයි උන් එක්ස්ට්‍රා කවර් සිට.....
මෑනො නොයන් දැන් නම් සික්සර් එකට......
05.
ජෙල් ගාලා හිස පීරන් මෑනෝ......
හෙල්මට අරගෙන බැඳගන් මෑනෝ.....
පෑඩිං දණ වට පළඳින් මෑනෝ .....
බැටිං කරාන්නට යමු අපි මෑනෝ.....
දැලෙන් දැලට කළ ප්‍රැක්ටිස් වන්නේ.....
මිටින් අතින් හෙම "ටිප්" නොකරාන්නේ....
ෂුවර් නැතුව එළියට නොපනින්නේ......
ඉතින් බයක් නැත කීපරයාන්නේ......
06.
රන් වන් පිති ගෙන නිති සැරසෙනවා.....
රත් කොළ එළි උඩ විනිසුරු දෙනවා....
හිරු ලෙස එළි කණු පෙළ පෑහෙනවා...
පල්ලෙකැලේ අපි ක්‍රිකට් ගහනවා.......
07.
ලොව බාරයි අයි.සී.සී මැරයන්ට.....
ලක බාරයි එස්.එල්.සී රිලවුන්ට.....
සැප බාරයි Bet බුකි තක්කඩියාන්ට....
අප බාරයි අයි.පී.එල් දෙවියාන්ට........

සයිබර වරිගෙ උණ්ඩියා